1934 нче елда Айбаш авылында башлангыч мәктәп оеша. Ул вакытта мәктәп хәзерге Айбаш җирле үзидарә советы бинасында була. Әүвәлрәк башлангыч белем Айбаш мәктәбендә бирелсә, белемнәрен дәвам итәргә теләүчеләр Чувашиле авылындагы сигезьеллык мәктәпкә йөриләр. Айбашта 1964 нче елның 1 сентябрендә генә сигезьеллык мәктәп эшли башлый. Аңа директор итеп Дәүләтшин Әнвәр Дәүләтша улы билгеләнә. Ә инде урта белем алырга теләүчеләр күршедәге Мәмдәл авылына йөреп укыганнар. Анда уньеллык мәктәп була. 

Бездә 1974 нче елда гына сигезьеллык мәктәп урта мәктәп итеп үзгәртелә. Балалар күп булу сәбәпле, яңа типовой мәктәп салу көн тәртибенә килеп баса.

1979 нчы елның 1 нче сентябрендә 392 урынга исәпләнгән яңа, 2 этажлы кирпеч мәктәпне ачу тантанасы була. Шулай итеп, мәктәп авыл уртасыннан авыл башына менеп урнаша. Бу мәктәп бүген дә балаларга белем бирү урыны булып тора. Аның белән Вәлиев Рамил Әхәт улы җитәкчелек итә. Хәзерге вакытта мәктәптә барлыгы 84 укучы белем ала. 

Иске мәктәп бинасы һәм мәктәп интернаты бүген дә халыкка хезмәт итә: интернат балалар бакчасы итеп файдаланыла, мәктәпнең иске бинасында Айбаш авыл җирле советы, мәдәният йорты, китапханә, медпункт һәм почта бүлекчәсе урнашкан.